Сядзіба Іваноўскіх "Лябёдка". Сядзіба ў стылі мадэрн была пабудавана Леанардам Іваноўскім у 1909 годзе. Пры ім маёнтак стаў адным з найбольш развітых і перадавых: была ўдасканалена сістэма дрэнажу, пабудаваны паравы млын, а навакольныя землі засажаныя лесам. Але найбольш Леанард развіваў садаводства: яблыкі, грушы, слівы, вішні і чарэшні з яго сада ішлі на лепшыя маскоўскія і пецярбургскія рынкі. Цікава, што сыны Леанарда і яго жонкі Ядзвігі з Райхеляў сталі грамадзянамі трох краін: Беларусі, Польшчы і Літвы. Старэйшых сын Ежы атрымаў сядзібу ў спадчыну, стаў міністрам і сенатарам у Польшчы. Другі сын Вацлаў, заснаваў першае беларускае выдаведства ў Пецярбургу, быў міністрам асветы БНР, стаў доктарам тэхнічных навук. Трэці сын, Тадас, стаў навукоўцам-біёлагам у Літве, заснаваў універсітэт і заапарк у Каўнасе. Апошнім уладальнікам сядзібы быў малодшы з братоў – Станіслаў. У 1939 годзе, з прыходам савецкай улады ён з’ехаў у Вільнюс. Яго сын, Казімер у 1995 годзе напісаў кнігу ўспамінаў пра жыццё ў сядзібе. Некаторы час сядзіба руйнавалася, а ў 1971 годзе тут быў адкрыты дом-інтэрнат для дзяцей з асаблівасцямі псіхафізічнага развіцця. У наш час Васілішкаўскі пансіяната "Васількі". Гэта закрытая ўстанова, таму паглядзець зблізу будынак сядзібы даволі складана.